Belagavi news:
ವಾಷಿಂಗ್ಟನ್ (ಅಮೆರಿಕ): ಅಮೆರಿಕದಲ್ಲಿ ಪರಮಾಣು ವಿದ್ಯುತ್ ಕ್ಷೇತ್ರಕ್ಕೆ ಹೊಸ ಚೈತನ್ಯ ತುಂಬುವ ಮಹತ್ವದ ಬೆಳವಣಿಗೆಯೊಂದನ್ನು ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಘೋಷಿಸಿದ್ದಾರೆ. ಸುಧಾರಿತ ಮೈಕ್ರೋ ರಿಯಾಕ್ಟರ್ ಹಾಗೂ ಪರಮಾಣು ರಿಯಾಕ್ಟರ್ ಅಭಿವೃದ್ಧಿಗೆ ತಮ್ಮ ಆಡಳಿತ ನಿಗದಿಪಡಿಸಿದ್ದ ಮಹತ್ವಾಕಾಂಕ್ಷೆಯ ಗಡುವನ್ನು ನಾಲ್ಕು ಖಾಸಗಿ ಕಂಪನಿಗಳು ಯಶಸ್ವಿಯಾಗಿ ಪೂರೈಸಿವೆ ಎಂದು ಶುಕ್ರವಾರ ತಿಳಿಸಿದರು. ಇದನ್ನು ಅಮೆರಿಕದ ಇಂಧನ ಭದ್ರತೆ ಮತ್ತು ವಿದ್ಯುತ್ ಉತ್ಪಾದನೆಯಲ್ಲಿ ಹೊಸ ಯುಗದ ಆರಂಭ ಎಂದು ಟ್ರಂಪ್ ಬಣ್ಣಿಸಿದ್ದಾರೆ.
ಅಮೆರಿಕದ ಪರಮಾಣು ನಾವೀನ್ಯತೆ ಕುರಿತ ಭಾಷಣದಲ್ಲಿ ಮಾತನಾಡಿದ ಟ್ರಂಪ್, "ಇದು ನಾಗರಿಕ ಪರಮಾಣು ಶಕ್ತಿಗೆ ಐತಿಹಾಸಿಕ ಮೈಲಿಗಲ್ಲು. ಅಮೆರಿಕದಲ್ಲಿ ಪರಮಾಣು ಶಕ್ತಿಯ ಅದ್ಭುತ ಪುನರುಜ್ಜೀವನವನ್ನು ನಾವು ಆಚರಿಸುತ್ತಿದ್ದೇವೆ ಎಂದು ಹೇಳಿದರು.
ಅವರ ಆಡಳಿತದ ಅವಧಿಯಲ್ಲಿ ಸಹಿ ಮಾಡಲಾದ ಕಾರ್ಯಕಾರಿ ಆದೇಶಗಳ ಮೂಲಕ ಪರಮಾಣು ಯೋಜನೆಗಳ ಮೇಲಿನ ನಿಯಂತ್ರಕ ಅಡೆತಡೆಗಳನ್ನು ಕಡಿಮೆ ಮಾಡಿ ದೇಶೀಯ ಪರಮಾಣು ವಿದ್ಯುತ್ ಉತ್ಪಾದನೆಯನ್ನು ವೇಗಗೊಳಿಸುವ ಗುರಿ ಹೊಂದಲಾಗಿತ್ತು. ಈ ಕ್ರಮದ ಫಲವಾಗಿ ಈಗ ನಾಲ್ಕು ಕಂಪನಿಗಳು ಮಹತ್ವದ ಗಡುವು ತಲುಪಿರುವುದು ಅಮೆರಿಕದ ಇಂಧನ ಕ್ಷೇತ್ರಕ್ಕೆ ದೊಡ್ಡ ಸಾಧನೆಯಾಗಿದೆ.
ಟ್ರಂಪ್ ಮಾತನಾಡುತ್ತಾ, " ಅಮೆರಿಕ ಮತ್ತೆ ನಿರ್ಮಿಸುತ್ತಿದೆ, ಅಮೆರಿಕ ಮತ್ತೆ ಕನಸು ಕಾಣುತ್ತಿದೆ. ಕಳೆದ ವರ್ಷ ಪರಮಾಣು ವಿದ್ಯುತ್ ಉತ್ಪಾದನೆಯನ್ನು ಪುನರುಜ್ಜೀವನಗೊಳಿಸಲು ನಾಲ್ಕು ಐತಿಹಾಸಿಕ ಕಾರ್ಯಕಾರಿ ಆದೇಶಗಳಿಗೆ ಸಹಿ ಹಾಕಿದ್ದೆ. ಜುಲೈ 4 ರೊಳಗೆ ಸುಧಾರಿತ ರಿಯಾಕ್ಟರ್ ಗಳಿಗಾಗಿ ಪೈಲಟ್ ಕಾರ್ಯಕ್ರಮ ಸ್ಥಾಪಿಸಿ, ಕನಿಷ್ಠ ಮೂರು ಅತ್ಯಾಧುನಿಕ ರಿಯಾಕ್ಟರ್ ಗಳನ್ನು ಸುರಕ್ಷಿತವಾಗಿ ಆರಂಭಿಸುವಂತೆ ಇಂಧನ ಕಾರ್ಯದರ್ಶಿ ಕ್ರಿಸ್ ರೈಟ್ ಗೆ ಸೂಚನೆ ನೀಡಿದೆ. ಈ ಗುರಿ ಅಸಾಧ್ಯ ಎಂದು ಹಲವರು ಭಾವಿಸಿದ್ದರು. ಆದರೆ 4 ಕಂಪನಿಗಳು ಅದನ್ನು ಸಾಧಿಸಿವೆ ಎಂಬುದನ್ನು ಘೋಷಿಸಲು ನನಗೆ ಸಂತೋಷವಾಗಿದೆ" ಎಂದು ಹೇಳಿದರು.
ಅಮೆರಿಕ ಆಡಳಿತದ ಪ್ರಕಾರ, ನಾಲ್ಕು ದಶಕಗಳ ಬಳಿಕ ಮೊದಲ ಬಾರಿಗೆ ಹೊಸ ತಲೆಮಾರಿನ ಪರಮಾಣು ರಿಯಾಕ್ಟರ್ ವಿನ್ಯಾಸಗಳು ದೇಶದಲ್ಲಿ ಸಕ್ರೀಯ ಅಭಿವೃದ್ಧಿಯ ಹಂತ ತಲುಪಿವೆ. ಇದೇ ವೇಳೆ, ಅಧ್ಯಕ್ಷ ಟ್ರಂಪ್ ಅವರ ಜೆನೆಸಿಸ್ ಮಿಷನ್ ಅಡಿಯಲ್ಲಿ ಆಯ್ಕೆಯಾದ ಮೊದಲ ಯೋಜನೆಗಳನ್ನು ಅಮೆರಿಕದ ಇಂಧನ ಇಲಾಖೆ (DOE) ಪ್ರಕಟಿಸಿದೆ.
ಜೆನೆಸಿಸ್ ಮಿಷನ್ ನ ಉದ್ದೇಶ ಅಮೆರಿಕದ ವೈಜ್ಞಾನಿಕ ಸಂಶೋಧನೆಗೆ ಹೊಸ ವೇಗ ನೀಡುವುದಾಗಿದೆ. ವಿಶ್ವದರ್ಜೆಯ ವೈಜ್ಞಾನಿಕ ಸಾಮರ್ಥ್ಯ, ಕೃತಕ ಬುದ್ಧಿಮತ್ತೆ (AI), ಉತ್ಪನ್ನ ಕಾರ್ಯಕ್ಷಮತೆಯ ಕಂಪ್ಯೂಟಿಂಗ್ ಹಾಗೂ ದೇಶದ ಪ್ರಮುಖ ಸಂಶೋಧಕರನ್ನು ಒಟ್ಟುಗೂಡಿಸಿ ವಿಜ್ಞಾನ ಮತ್ತು ತಂತ್ರಜ್ಞಾನ ಕ್ಷೇತ್ರದಲ್ಲಿ ಅಮೆರಿಕದ ನಾಯಕತ್ವವನ್ನು ಮತ್ತಷ್ಟು ಬಲಪಡಿಸುವುದು ಈ ಯೋಜನೆಯ ಗುರಿಯಾಗಿದೆ.
ಅಮೆರಿಕದ ಇಂಧನ ಕಾರ್ಯದರ್ಶಿ ಕ್ರಿಸ್ ರೈಟ್ ಮಾತನಾಡಿ, " ಅಮೆರಿಕದಲ್ಲಿ ಪ್ರತಿಭಾವಂತ ವಿಜ್ಞಾನಿಗಳು ಸಹ ಹೊಸ ಆಲೋಚನೆಗಳಿಗೆ ಕೊರತೆಯಿಲ್ಲ. ಆಯ್ಕೆಯಾದ 278 ಯೋಜನೆಗಳು ನಮ್ಮ ದೇಶದ ಅತ್ಯುತ್ತಮ ವೈಜ್ಞಾನಿಕ ಸಾಮರ್ಥ್ಯವನ್ನು ಪ್ರತಿನಿಧಿಸುತ್ತವೆ. ಇವು ಭವಿಷ್ಯದ ಇಂಧನ, ತಂತ್ರಜ್ಞಾನ ಮತ್ತು ವೈಜ್ಞಾನಿಕ ಅಭಿವೃದ್ಧಿಗೆ ಹೊಸ ದಿಕ್ಕು ನೀಡಲಿವೆ" ಎಂದು ಹೇಳಿದ್ದಾರೆ.
